Útskrift 10. bekkjar var haldin hátíðleg mánudaginn 5. júní í matsal skólans. Salurinn var í hátíðarbúningi. Nemendur og foreldrar mættu spariklæddir á útskriftina sem og kennarar skólans. Athöfnin hófst á ávarpi Guðrúnar G. Halldórsdóttur skólastjóra. Fulltrúi foreldrahópsins, Helgi Aðalsteinsson flutti skemmtilegt ávarp til útskriftarnema og í kjölfarið kom að stóru stundinni þar sem Margrét Ármann aðstoðarskólastjóri, afhenti einkunnir sem og viðurkenningar fyrir góðan námsárangur. Skemmtiatriði komu frá útskriftarnemanum Ölmu Bergrós Hugadóttur, sem spilaði á þverflautu glæsilegt tónverk. Tveir útskriftarnemar, þær Eygló Ása Enoksdóttir og Unnur Helga Haraldsdóttir stigu í pontu og fluttu hressandi ávarp til hópsins. Unglingakennarar stigu síðan á stokk og sungu texta til útskriftarnema við lagið „Góða ferð“ en textann gerði Þóra Björg Stefánsdóttir, íslenskukennari. Að lokum gæddu allir sér á girnilegu hlaðborði sem foreldrar útskriftarnema sáu um. Starfsfólk Lindaskóla óskar útskriftarnemum til hamingju með daginn og óskar þeim velfarnaðar í framtíðinni.
Núpalind 7 - Sími: 441-3000