Í vetur var farið af stað með nýtt verkefni í Lindaskóla sem hugsað er 5.-7.bekk. Tilgangurinn með verkefninu er að blanda árgöngum saman með það að leiðarljósi að nemendur kynnist og myndi gott samband.
Við leggjum áherslu á samvinnuverkefni þar sem nemendur vinna verkefni sem reyna á samskipti og samvinnu ásamt því að fara í leiki með hópana. Kurlið er kennt einu sinni í viku allan veturinn í 80 mínútur í senn.
Ávinningur af svona verkefni felst meðal annars í að samskipti á milli árganga verða betri og nemendur eignast vini á milli árganga. Sköpunargleði og útsjónarsemi eykst. Samvinna og samkennd eykst og samstarf á milli kennara sömuleiðis. Síðast en ekki síst þá er gaman og það eru nemendur og kennarar sammála um.
Undir lok skólaársins réðust nemendur og kennarar í það verkefni að búa til skólablað. Endilega smellið á hlekkinn hér fyrir neðan og kíkið hið stórskemmtilega blað, Kurlfréttir.